حامد کرزي د امریکا له خوا په افغانستان کې د غټ بم غورځول په کلکه وغندل

کابل (پژواک، ۲۵ وری ۹۶): حامد کرزي د امریکا له خوا په افغانستان کې د تر ټولو غټ بم استعمال غندلی خو د حکومت اجرائیه رییس ډاکتر عبدالله د دغه برید د هرکلي تر څنګ ویلي چې دغه کار د افغانستان له حکومت سره په همغږۍ ترسره شوی دی.

د حامد کرزي له دفتره پژواک خبري اژانس ته په رالېږل شوې خبرپانه کې راغلي چې حامد کرزي په افغانستان له تر ټولو د غټ بم کارونه چې د لومړي ځل لپاره په جګړه کې ترې کار اخیستل کېږي، په کلکه غندي.

کرزي ویلي: ((دغه برید د افغانستان د ملي حاکمیت، ځمکنۍ بشپړتیا او چاپېریال څرګند نقض دی.))

مخکني ولسمشر زیاته کړې ده: ((دغه برید د ترهګرۍ پر وړاندې جګړه نه، بلکې د افغانستان په خاوره کې د امریکا د نوو ټولوژونکو وسلو د ازمایښت لپاره یوه پلمه ده او دا زموږ افغانانو دنده ده چې په افغانستان کې د امریکا د دې ډول بریدونو مخنیوی وکړو.))

په عین حال کې د حکومت اجرائیه رییس ډاکتر عبدالله ويلي، دغه برید چې تېره ورځ ماښام ترسره شو، د افغانستان له حکومت سره په همغږۍ و.

هغه په خپله ټویټر پاڼه کې ویلي: ((دغه بم په هغې سیمه کې چې داعش له هغې د نظامي مرکز او د وسلو د زېرمې په توګره ترې کار اخیست، غورځول شوی دی.))

اجرائیه رییس په ټویټر کې لیکلي: ((د داعش د خطر له امله له یادې سیمې ډېر کورنۍ بېځایه شوې وې خو حکومت دغه راز د ملکي خلکو د نه زیانمنېدو په برخه کې جدي اقدام کړی و.))

عبدالله څرګنده کړې، دغه عملیات ښيي چې په افغانستان کې د داعش او ترور د نورو مرکزونو د له منځه وړو لپاره ګډه اراده شتون لري.

امریکايي سرچینو ویلي چې دغه نهه متري او لس ټنه وزن لرونکی بم، د الوتکې د شا له برخې پر موخه غورځول کېږي او د دې هر یو ۱۶ میلیونه امریکايي ډالره ارزښت لري.

د دې تر څنګ د ننګرهار د اچین ولسوال اسماعیل شینواري پژواک خبري اژانس ته وویل چې خلک د بم له غورځېدو مخکې له سیمې ایستل شوي وو.

د هغه په خبره، په دې پېښه کې ملکي خلکو ته زیان نه دی رسېدلی خو احتمال شته هغو ملکیانو ته چې له داعش سره زنداني وو، زیان رسېدلی وي.