د پکتیکا قومي مشران: چمتو یو خپل اولادونه ملي اردو ته ورکړو

ښرنه (پژواک، ٦ غويی ٩٦): په پکتيکا کې قومي مشرانو د يوې غونډې په ترڅ کې وويل چې د شاهين قول اردو د پېښې د غچ اخيستو لپاره چمتو دي خپل اولادونه د ملي ځواکونو په ليکو کې داخل کړي.

وسله والو طالبانو د تېرې جمعې د لمانځه پر مهال په بلخ ولايت کې د شاهين قول اردو پر قوماندانۍ ډله ييز بريد وکړ چې د وروستيو معلوماتو له مخې، په دې پېښه کې تر ٢٠٠ ډېرو کسانو ته مرګ ژوبله واوښته.

د اړوندې موضوع په اړه په مرکز ښرنه کې د غويي په ٦مه د قومي مشرانو او مدني ټولنو ګډه غونډه جوړه شوې وه.

په دې غونډه کې د قومي مشرانو په استازيتوب ميرزا خان وويل چې په بلخ ولايت د شاهين قول اردو وروستې پېښې د دغه ولايت خلک سخت غمجن کړي دي.

هغه زياته کړه: ((زه حاضر يم د دې پېښې د غچ اخيستو لپاره خپله پنځه زامن د ملي ځواکونو په ليکو کې داخل کړم.))

ميرزا خان تور پورې کړ چې د افغانستان په روانه جګړه د پاکستان استخباراتي اداره لاس لري چې بايد حکومت يې مخه ونيسي.

دغه راز بل قومي عبدالمنان هم ورته څرګندونې وکړې او ويې ويل چې په هېواد کې د امنيت د ټينګښت په موخه د دغه ولايت ټول خلک چمتو دي چې له ملي ځواکونو سره يو ځاى شي.

هغه له حکومت څخه غوښتنه وکړه چې د امنيت د ټينګښت په موخه دې په ځينو سيمو کې قومي مشرانو ته هم وسلې ورکړي.

په دې غونډه کې يو شمېر نورو قومي مشرانو هم ورته څرګندونې وکړې.

د غونډې په پاى کې په پکتيکا کې د مدنې ټولنو د همغږۍ دفتر مشر خورشيد امان کټوازي وويل چې يو شمېر افغانان د پرديو په لمسون د خپل هېواد امنيت له ګواښ سره مخ کوي.

ده له قومي مشرانو غوښتنه وکړه چې په هېواد کې د امنيت د ټينګښت په موخه سره يو لاس شي.

د يادونې ده، د غونډې په پاى قومي مشرانو يو شمېر امنيتي سرتېرو ته ګلان هم په غاړه کې واچول.