چارواکي: په لوګر کې ٢٧وسله والو ته مرګ ژوبله اوښتې

پل علم(پژواک،٢٦غويى٩٦): د لوګر په مرکز او بره کي برک ولسوالۍ کې د امنيتي ځواکونو او طالبانو ترمنځ جګړه کې دواړو لوريو ته مرګ ژوبله اوښتې ده.

د لوګر د والي وياند سليم د غويي په ٢٦مه پژواک خبري اژانس ته وويل چې تېره شپه د مرکز اړوند په بابوس، سرسنګ، الوزيو، زرداد کلا او بره کي برک ولسوالۍ کې د امنيتي ځواکونو او وسله والو طالبانو ترمنځ جګړه شوې ده .

هغه وايي چې په دې جګړه کې ١٢ وسله وال طالبان وژل شوي او ١٥ طالبان او څلور امنيتي سرتېري ټپيان دي.

هغه زياته کړه: (( په دې سيمو کې موږ چاڼيز عمليات پيل کړي او دا لړۍ به دوام ولري.))

د بابوس د سيمې يوه اوسېدونکي داوود پژواک ته وويل چې تېره شپه سيمې ته امنيتي ځواکونه ورغلي وو.

هغه وايي: (( دلته د طالبانو او عسکرو ترمنځ جګړه وشوه او څو ساعته يې دوام وکړ.))

ده زياته کړه چې په دې جګړه کې شپږ طالبان او د کلي يو ښوونکى وژل شوي دي.

 د لوګر د پوهنې رياست وياند شاپور عرب پژواک ته وويل چې تېره شپه د بابوس لېسې ښوونکى محمد عمران د افغان امنيتي ځواکونو او طالبانو ترمنځ جګړه کې وژل شوى دى.

هغه په دې اړه نور جزئيات ورنه کړل.

د وسله والو طالبانو وياند ذبيح الله مجاهد په خپله ټويټر پاڼه کې ليکلي چې تېره شپه د لوګر په الوزيو سيمه کې د طالبانو او امنيتي ځواکونو ترمنځ جګړه شوې ده.

هغه وايي چې په دې جګړه کې ٢٥ امنيتې سرتېري او يو طالب وژل شوي او درې طالبان ټپيان دي.