هلمند کې هم د حکومت په ملاتړ غونډه وشوه

لښکرګاه (پژواک، ١٩ غبرګولى ٩٦): په هلمند کې د مدني ټولنې غړي وايي، بهرني استخبارات په هېواد کې قومي او ژبني اختلافاتو ته لمن وهي چې بايد مخه يې ونيول شي.

د هلمند د مدني ټولنو د همغږۍ دفتر مشر خداى نور خانزاده د يوې خبري غونډې په ترڅ کې وويل چې ځيني کسان د خپلو شخصي ګټو لپاره د قومونو تر منځ اختلافات را پيدا کوي.

هغه وايي: ((موږ د نظام په ملاتړ راټول شوي يو او نه غواړو چې څوک قومونه سره جلا کړي او حکومت کمزورى کړي.))

خانزاده پر حکومتي چارواکو غږ وکړ چې د هغو لاريونونو مخه ونيسي چې حکومت ته ستونزې جوړوي.

ده تور پورې کړ چې يو شمېر کسانو د ايران او پاکستان په اشاره په کابل ښار او ځينو نورو سيمو کې خېمې درلولې او خلکو ته يې ستونزې جوړې کړې دي.

په دې غونډه کې د مدني ټولنې بل غړي مطيع الله مطيع وويل چې يو شمېر کسانو د حکومت د کمزري کولو لپاره سياسي لوبې پيل کړې دي.

هغه زياته کړه: ((د حکومت بنسټونه قوي شوي خو ځيني کسان يې د کمزري کولو هڅې کوي.))

دغه راز د مدني ټولنې بل غړي امان الله وويل چې د هلمند اوسېدونکي له حکومت څخه ملاتړ کوي او په هره برخه کې ورسره همکاره دي.

هغه وويل چې يو شمېر استخباراتي کړۍ په هېواد کې د قومونو د بېلتون لپاره هڅې کوي نو هېوادوالو ته په کار ده چې په دغه حساس وخت کې له هر ډول لاريون او حکومت ته له سرخوږي جوړولو تېر شي.