چارواکي : د لوګر بره کي برک کې دوه ځانمرګي بريد کوونکي نيول شوي

پل علم(پژواک،٢٢غبرګولى٩٦): د لوګر په بره کي برک ولسوالۍ کې دوه ځانمرګي بريد کوونکي موخې ته له رسېدو مخکې ونيول شول.

د بره کي برک ولسوال محمد رحيم امين د غبرګولي په ٢٢مه پژواک خبري اژانس ته وويل، پرون مازيګر دوه ځانمرګو بريدګرو غوښتل چې د ولسوالۍ پر ودانۍ بريد وکړي.

د هغه په وينا، وړاندې تر دې چې دغه ځانمرګي بريد وکړي د امنيتي ځواکونو له لوري ونيول شول.

د ولسوال د معلوماتو له مخې، دغه ځانمرګي بريد کوونکي ضياالله او محمد الله نوميږي چې د بره کي برک د شامزار او رستم خېلو سيمو اوسېدونکي دي.

امين وايي چې دغه بريد کوونکي د حقاني شبکې د قاري ذبيح الله د ډلې کسان دي.

دغه راز  د لوګر د والي وياند سليم صالح هم دغه پېښه تاييد کړه.

هغه وويل چې نيول شوي کسان د څېړنو په موخه عدلي او قضايي ارګانونو ته سپارل شوي دي.

د حقاني شبکې تر اوسه په دې اړه څه نه دي ويلي.

د يادونې ده چې په تېرو څو کلونو کې دا لومړى ځل دى چې په لوګر ولايت کې ځانمرګي بريد کوونکي ژوندي نيول کيږي.