په کاپيسا کې ١١ وسله وال وژل شوي

محمودراقي (پژواک، ٢٣ غبرګولى ٩٦): د کاپيسا امنيتي چارواکي وايي چې د يوې نښتې پر مهال ١١ وسله والو مخالفينو ته مرګ ژوبله اوښتې ده.

د دغه ولايت د امنيې قوماندانۍ وياند محمد ايوب يوسفزي د غبرګولي په ٢٣مه پژواک خبري اژانس ته وويل چې نن سهار د تګاب ولسوالۍ د بابا خېلو په سيمه کې د وسله والو مخالفينو او سيمه ييزو پوليسو تر منځ جګړه شوې ده.

هغه زياته کړه چې سيمه ييزو پوليسو او د سيمې پاڅونوالو له وسله والو سره کلک مقاومت کړى او ١١ تنه يې وژلي دي.

د نوموړي په وينا، په دې نښته کې شپږ پاڅون کوونکي هم ټپيان شوي چې د تګاب ولسوالۍ د باباخېلو سيمې اوسېدونکي دي.

يوسفزى وايي چې وسله وال له سيمې تښتېدلي او د وژل شوو جسدونه يې د هم د جګړې په ډګر کې پاتې دي.

د تګاب ولسوالۍ يو اوسېدونکى بختيار وايي، نن سهار يې په سيمه کې څو ساعته جګړه شوې وه او دوى هم د وسله والو له مرګ ژوبلې خبر شوي دي.

د هغه په وينا، سيمه ييزو پوليسو ته هم مرګ ژوبله اوښتې، خو کره شمېره ورته نه وه معلومه.

وسله والو مخالفينو تر اوسه په دې اړه څه نه دي ويلي.