د هلمند د مارجې ولسوالۍ لارې بېرته تړل شوې دي

لښکرګاه (پژواک، ٢٦ غبرګولى ٩٦) : د هلمند ولايت د مارجې ولسوالۍ مسوولين وايي ، چې  تېرو دوه ورځو کې تر ولسوالۍ پورې دوه پاتې خلاصې لارې هم بېرته تړل شوې دي.

ددې ولايت د امنيه قوماندانۍ يوې سرچينې پژواک اژانس ته وويل، چې عمليات يوازې د اردو د پرسونل د تبديلۍ او پوليسو د نوي ټاکل شوي قوماندان د رسولو لپاره شوي وي، اضافي پرسونل نن بيرته تلى دى.

د سرچينې په وينا، د اضافي پرسونل تګ سره اوس سولا و شمال ته پرانستل شوې لارې بېرته تړل شوې دي.

 د سرچينې په ويناپ، د ملي اردو قوماندان او پرسونل ولاړل او له ځنډه پرته طالبانو لارې بندې کړ.

بل خوا د هلمند د امنيه قوماندانۍ وياند دوهم څارن عبدالسلام افغان وايې هلته ورغلي پرسونل خپل عملياتو مسير بدل کړی،  ختم شوي ندي.

دی وايي د عملياتو نوی هدف د طالبانو د اکمالاتو  لارو بنديل دي، بل خوا يوازې تېره شپه تر شلو  ډير طالبان او د هغو قوماندان وژل شوي دي.

افغان وايي، چې تېره شپه د ګرشک ولسوالۍ په مربوطاتو د کندهار- هرات لوی لارې پر سر د کمين په ترڅ کې ۵ تنه طالبان وژل شوي او يو پوليس ټپي شوی دى.
د ياد ولوده چې د هلمند والي حيات الله حيات څو ورځې مخکې ويلي وو، چې  د مارجې عمليات د اکمالاتي لارو د خلاصولو او دوامداره امنيت لپاره ترسره کيږي.

د طالبانو وياند قاري يوسف احمدي وايي، چې په مارجه کې حکومتي ځواکونو له ماتې وروسته له سيمې وتلي او ګڼ شمېر سرتېرو ته يې مرګ ژوبله اوښتې ده.