د کاپيسا د پوهنې رياست د اسلامي زده کړو مرستيال ووژل شو

محمودراقي(پژواک،١٠چنګاښ٩٦): د کاپيسا امنيتي چارواکي وايي چې د افغان دولت وسله والو مخالفينو د دې ولايت د پوهنې رياست د اسلامي زده کړو مرستيال پر ډزو وژلى دى.

د کاپيسا د امنيې قوماندانۍ وياند محمد ايوب يوسفزي د چنګاښ په  ١٠مه پژواک خبري اژانس ته وويل چې تېره شپه د کاپيسا په تګاب ولسوالۍ کې د دې ولايت د پوهنې رياست د اسلامي زده کړو مرستيال مولوي مجاهد عابد پر  ډزو وژل شوى دى.

د هغه په وينا، د عابد د تره زوى د افغان دولت د وسله والو مخالفينو په ليکو کې فعاليت کوي، نو دى هم د هماغه له لوري وژل شوى دى.

 نوموړی زیاتوي: (( د مولوی مجاهد عابد د تره زوی د وسله والو کس دى او په سیمه کې فعالیت کوي، زموږ څېړنې ښيي چې د نوموړي له خوا له کوره ویستل شوی او  بیا یې پر ډزو وژلی دی.))

بل خوا د مولوي عابد د کورنۍ یو غړي خیرالله ساپي پژواک ته وويل چې مولوي عابد په کابل ښار کې اوسيده ، خو  د اختر په مناسبت کلي ته تللى وو.

هغه هم وويل چې مولوي عابد پرون په تګاب ولسوالۍ کې وژل شوى، خو د پېښې په اړه يې نور جزئيات په ډاګه نه کړل.

د افغان دولت وسله والو مخالفينو تر اوسه په دې اړه څه نه دي ويلي.

د يادونې ده چې تر دې وړاندې هم څو ځلې په کاپيسا کې د پوهنې رياست کارکوونکي د افغان دولت د وسله والو مخالفينو له لوري وژل شوي دي.