کاپیسا کې د بېلابېلو جرمونو په تور پنځلس تنه نیول شوي

محمود راقي (پژواک، ١٨ چنګاښ ٩٦) : د کاپیسا امنیتي چارواکي وايي چې د  ولايت په مرکز کې يې د بېلا بېلو جرمونو په تور  ١٥ کسان نيولي دي.

د دې ولايت د امنیه قوماندانۍ ویاند محمد ایوب یوسفزي د چنګاښ په ١٨مه، پژواک خبري اژانس ته وویل چې له اختر راهيسې د مرکز اوسېدونکو د غلو له شتون څخه شکايت کاوه .

هغه زياته کړه، د همدې شکايتونو په پايله کې پوليسو اقدامات وکړل او ١٥ کسان يې ونيول چې اوس تر پلټنو لاندې دي.

د نوموړي په وينا، دغو کسانو په غلاوو، زنا او د شرابو په خرڅلاو کې لاس درلود او له  هر نیول شوي کس څخه په سیمو کې خلکو ګڼ شمېر شکایتونه هم کړي دي.

يوسفزى زیاتوي:« نیول شوي کسان د کاپیسا د مرکز، اول کوهستان او د دویم کوهستان اوسېدونکي دي دوی د شپې پر مهال پر لویو لارو او  له يو شمېر کورونو غلاوې کولې او په سیمه کې یې جنايي پېښې رامنځته کولې. ))

وياند وايي، له څو ورځو راهیسې د کاپیسا د مرکز په لویو او وړو سړکونو باندې د تالاشۍ کمربندونه  جوړ شوي او  د دې خلکو په نیولو کې اغېزمن تمام شوي دي.