خوست ښار (پژواک، ۱۲ زمری ۹۶): په سوېل ختيځ کې د يوناما سيمه ييز دفتر وايي چې په تېرو شپږو مياشتو کې په خوست کې د ناپېژاندو وسله والو له لوري د ملکي وګړو هدفي وژنې ډېرې شوې دي.
په ګردېز کې د يوناما يا د ملګرو ملتونو له سياسي دفتره د زمري په ١٢مه پژواک اژانس ته په رالېږل شوې خبرپاڼه کې راغلي چې د ۲۰۱۷ ميلادي کال په لومړيو شپږو مياشتو کې د خوست په مرکز او ولسواليو کې ۲۲ کسان په انفرادي ډول په نښه شوي دي.
سرچينه وايي چې د هدفي وژنو په ترڅ کې ۱۳ کسان وژل شوي او ۹ نور ټپيان شوي وو چې قومي مشران، ځيني دولتي مامورين او نور خلک په کې شامل دي.
د يوناما له لوري په ياده رالېږل شوې خبرپاڼه کې همدارنګه راغلي چې تر ځانمرګي بريدونو او بمي چاودنو وروسته هدفي وژنې درېيم ستر لامل دی چې په دغه ولايت کې د ملکيانو د مرګ ژوبلې سبب شوی.
که څه هم يادې سرچينې په خوست کې د تېر کال د هدفي وژنو شمېر نه دی ښودلی، خو ويلي يې دي چې په دغه ولايت کې د هدفي وژنو شمېر تر پخوا ډېر شوی او اندېښنه يې پرې څرګنده کړې ده.
په ورته وخت کې د خوست يوه اوسېدونکي جواس خان منګل پژواک اژانس ته وويل چې د هدفي وژنو زياتېدو يو لامل د پېښې له ځايه په ډېرې اسانۍ سره د بريدګرو تښتېدل دي.
ده وويل چې د هدفي وژنو په زياتره موادرو کې امنيتي ځواکونه په ځانګړي ډول پوليس پر دې نه دي بريالي شوي چې بريدګر ونيسي او د قانون منګولو ته يې وسپاري.
جواس خان زياتوي: ((په څو څو ځله ما په خپله ليدلي دي چې بريدګر پر يوې خوا تللي، خو پوليس په بلې خوا تللي دي. په خپله چارواکي د دې لپاره زمينه برابروي، کنه مخنيوی يې ولې نه شي کېدای؟))
د خوست ښار اوسېدونکي اصغر په وينا، که امنيتي ځواکونه په خپل منځ کې د کلکې همغږۍ تر څنګ د نا امنۍ پر نورو پېښو سربېره د هدفي وژنو د مخنيوي ټينګ هوډ ولري، هېڅوک بيا پر چا د بريد زړه نه شي ښه کولی.
ده زياته کړه: ((موږ نه پوهېږو چې امنيتي ځواکونه په خپل منځ کې همغږي نه لري او که په لوی لاس نه غواړي په خوست کې د هدفي وژنو مخه ونيسي.))
بل لور ته د خوست امنيه قوماندان مل پاسوال فيض الله غيرت بيا نه مني چې ګني په دغه ولايت کې د هدفي وژنو شمېر ډېر شوی، خو زياتوي چې په ځينو مواردو کې يو شمېر کسان د شخصي دښمنۍ پر بنسټ په نښه شوي دي.
قوماندان غيرت پژواک اژانس ته وويل چې د شخصي دښمنۍ پر بنسټ د وژنو عاملين تر ډېره بريده نيول شوي خو په دې برخه کې يې کره ارقام په ګوته نه کړل.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن