د پکتیکا په ګومل کې ۲۰ وسله والو ته مرګ ژوبله اوښتې

ښرنه (پژواک، ١٨ زمرى ٩٦): د پکتيکا په ګومل ولسوالۍ کې د افغان ځواکونو او وسله والو طالبانو ترمنځ جګړه کې ١١ طالبان وژل شوي او شپږ نور ټپيان دي.

په ګومل کې د سرحدي ځواکونو قوماندان رازمحمد طوفان د زمري په ١٧مه پژواک خبري اژانس ته وويل چې امنيتي ځواکونه اوس هم د ګومل په لويه لار کې په چاڼيزو عملياتو بوخت دي.

ده زياته کړه، د همدې عملياتو په ترڅ کې تېره شپه د خنګلۍ په سيمه کې ١١ وسله وال طالبان وژل شوي او شپږ نور ټپيان دي او زیاتوي چې امنيتي ځواکونو ته مرګ ژوبله نه ده اوښتې.

د هغه په وينا، وسله والو طالبانو د ګومل پر لويه لار ماينونه خښ کړي چې له امله يې د دوى عمليات ورو روان دي.

دى زياتوي: ((هم يې ماينونه خښ کړي، هم د غرونو په سرونو ناست دي او پر امنيتي ځواکونو ډزې کوي، نو ځکه موږ ورو مخې ته ځو.))

خو په دې سيمه کې د سيمه ييزو پوليسو يوه سرتېري د نوم نه خپرېدو په شرط پژواک ته وويل، تېره ورځ د خنګلۍ په سيمه کې پر امنيتي ځواکونو د ماين چاودنه شوې چې له امله یې يو سرتېرى وژل شوى او پنځه نور ټپيان دي.

وسله وال طالبان هم د ګومل جګړه تاييدوي.

د دې ډلې وياند ذبيح الله مجاهد پژواک ته وويل، له تېرو نهو ورځو راهيسې طالبانو د ګومل ولسوالۍ کلابنده کړې ده.

د ده په خبره، طالبانو ګومل ته غځېدلې ټولې لارې بندې کړې دي او امنيتي ځواکونو ته د ورتګ اجازه نه ورکوي.

نوموړي د ګومل جګړې د مرګ ژوبلې په اړه څه ونه ويل.

د پکتيکا د امنيتي چارواکو د معلوماتو له مخې، په تېرو نهو ورځو کې د ګومل په جګړه کې سل طالبان او شپږ سرتېري وژل شوي، لس امنيتي سرتېري او ګڼ شمېر نور طالبان ټپيان شوي دي.