د پکتيکا ولايت دوه رييسان د فساد په تور نيول شوي

ښرنه (پژواک، ١٩ وږى ٩٦): د پکتيکا ولايت دوه رييسان د اداري فساد او جعل کارۍ په تور نيول شوي او تر پلټنو لاندې دي.

د دغه ولايت يوې لوړپوړي باوري سرچينې چې د نوم له څرګندولو يې ډډه کوله، د وږي په ١٩مه پژواک خبري اژانس ته وويل چې نيول شوو کې د پوهنې سرپرست رييس او د اقتصاد رييس شامل دي.

سرچينې زياته کړې چې دوى د ملي امنيت له لوري د اداري فساد او جعل کارۍ په تور نيول شوي او اوس تر پلټنو لاندې دي.

د پوهنې رياست يوې سرچيني چې نه غواړي نوم يې خپور شي، پژواک ته وويل چې د پوهنې سرپرست رييس محمد نسيم واجد د ملي امنيت له لوري نيول شوى دى.

هغه په دې اړه نور جزيات ورنه کړل.

د اقتصادرياست باوري سرچيني هم وايي، چې دپوهني له رييس سره يو ځای داقتصاد رييس هم نيول شوی دی.

د ملی امنيت رياست او دولايت مقام په دې اړه له ويلو ډډه کوي.