لوګر کې د یوه قوماندان په ګډون څلور وسله وال وژل شوي

پل علم (پژواک، ٢٠ وږى ٩٦): د لوګر په څرخ ولسوالۍ کې د هوايي بريد له امله د وسله والو طالبانو د يو مشهور قوماندان په ګډون څلور وسله وال وژل شوي دي.

د لوګر د والي وياند سليم صالح د وږي په ٢٠مه پژواک خبري اژانس ته وويل چې تېره شپه افغان امنيتي ځواکونو څرخ ولسوالۍ په اب جوش سيمه کې د وسله والو طالبانو پر يوه موټر بريد کړى دى.

هغه وايي چې په دغه بريد کې د وسله والو طالبانو مشهور قوماندان قاري اسماعيل له خپلو درېيو نورو ملګرو سره وژل شوى دى.

ده وويل چې د بريد پر مهال د دې وسله والو يو موټر، وسلې او نور مهمات هم له منځه تللي دي.

د هغه په وينا، قاري اسماعيل له تېرو څو کلونو راهيسې په مرکز پل علم او څرخ ولسوالۍ کې په وژنو، چاودنو او بريدونو کې پراخه ونډه درلوده.

صالح زياته کړه: ((د قاري اسماعيل په وژل کېدو سره به په لوګر کې طالبان اوس ډېر ضعيفه شي.))

دغه راز د اب جوش سيمې اوسېدونکي سيد محبوب پژواک ته وويل چې تېره ورځ د دوى په کلي کې يو سراچه موټر له هوا څخه په نښه شوى دى.

هغه وايي: ((په دې موټر کې ناست څلور وسله وال وژل شوي خو مخونه يې خراب دي نه پيژندل کېږي چې څوک دي.))

د کورنيو چارو وزارت هم د يوې اعلاميې په خپرولو سره ياده پېښه تاييد کړې ده.

په اعلاميه کې راغلي چې په دغه بريد کې د قاري اسماعيل په ګډون قاري سراج الدين، محمد طاهر او احمدګل هم وژل شوي دي.

همدارنګه د لوګر د والي وياند دا هم وويل چې تېره مازديګر ګڼو وسله والو طالبانو په څرخ ولسوالۍ پر پوستو بريدونه وکړل چې بريدونه يې پر شا وتمبول شول.

وسله والو طالبانو د يادو څرګندونو په اړه تر اوسه څه نه دي ويلي.

login or register a new account.