مزارشريف کې يو سوداګر ووژل شو

مزارشريف (پژواک ٢١ وږى ٩٦): د بلخ په مرکز مزارشريف کې وسله والو يو سوداګر په ډزو وژلى دى.

دغه سوداګر نجيب الله دوست نومېږي، چې د "پسران دوست" په نوم يې سوداګريز شرکت درلود او د هېواد دننه او بهر يې سوداګري کوله.

د دوست ماما احمد تميم، پژواک خبري اژانس ته وويل چې نن له ماسپښين وروسته په مزارشريف ښار کې جوزجاني مارکېټ ته څېرمه درې وسله وال د نجيب الله دوست موټر ته ورغلي، هغه يې په زوره له موټر راښکته کړى دى.

ده زياته کړه، نوموړى يې د ښار لوېديځ لوري ته بېولى او هملته يې په مرميو وژلى دى.

د بلخ د امنيت آمر مل پاسوال عبدالرزاق قادري دا پېښه تاييدوي او وايي، دوست د وسله والو له خوا د ښار غربي لور ته تښتول شوى، هلته ډزې پرې شوې، ټپى شوى او وروسته روغتون ته د لېږد پرمهال يې ساه ورکړې ده.

د هغه په وينا، د دې پېښې په تړاو څېړنې پيل شوې او تراوسه پورې يو کس هم نيول شوى دى.

بايد وويل شي په مزارشريف ښار کې دغه ډول پېښو خلک اندېښمن کړي دي.