خوست (پژوک، ٢٦ وږى ٩٦): د خوست ښار د مبايل پلورنځيو په يوه مارکېټ کې د ماين چاودنې له امله څلور کسان وژل شوي او ١٥ نور ټپيان دي.
د خوست امنيه قوماندان مل پاسوال فيض الله غيرت پژواک خبري اژانس ته وويل چې دا پېښه نن غرمه شاوخوا ١١:٠٠ بجې د خوست ښار مرکز کې د حمام په نوم د مبايل پلورنځيو مارکېټ په لاندني پوړ کې شوې ده.
د خوست دغه لوړ پوړي امنيتي چارواکي زياته کړه چې د یوه مبايل پلورنځي تر مېز لاندې د ماين چاودنه شوې ده.
د غيرت په خبره چې ټول وژل شوي او ټپيان ملکي وګړي دي.
نوموړي زياته کړه چې د پوليسو څېړنې پيل شوې، خو تر اوسه پورې څوک نه دي نيول شوي او نه ده څرګنده چې د چاودنې موخه څه وه.
د پېښې مسووليت چا پر غاړه نه دى اخيستى.
په ورته وخت کې د خوست د عامې روغتيا مشر ډاکتر حبيب شاه انصاري پژواک خبري اژانس ته وويل چې د پېښې له ځايه څلور مړي او ١٥ ټپيان روغتونونو ته لېږدول شوي دي.
هغه د يو شمېر ټپيانو روغتيايي حالت د اندېښنې وړ وباله.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن