مزارشريف (پژواک،۶ليندۍ۹۶): افغان ځوان سينماګرانو له دولت څخه د فلم جوړونې هنر ته د جدي پاملرنې غوښتنه وکړه.
دوی د ليندۍ په ۶مه، د بلخ ولايت مرکز مزارشريف ښار کې د ځوان افغان سينماګرانو ټولنې څانګه هم پرانيسته.
د يادې ټولنې مشر عارف نوري د دې ټولنې د جوړېدو هدف د سينما هنر د ودې لپاره د دولت د پاملرنې راړول په ګوته کړل.
نوموړي زياته کړه، چې په افغان ځوانانو کې د فلم جوړونې هنر ډېر دی، خو د امکاناتو د نشتوالي له امله له ستونزو سره مخ دي.
هغه په هېواد کې د سينماګانو له منځه وړل د فلمي هنر پر وړاندې ستر ناورين وباله.
عارف وويل: (( يو مهال په بلخ کې سينما فعاليت درلوده؛ خو ورانه کړای شوه او پر ځای يې اوس پارکينګ جوړ شوى دی.))
نوموړي له دولت څخه د هر اړخيز ملاتړ غوښتنه وکړه.
د افغان فلمونو ښځينه لوبغاړې سونيا سروري، چې د دغې ټولنې په پرانيسته کې يې برخه لرله؛ پژواک ته وويل، چې افغان هنرمندان وړتيا لري؛ خو ملاتړ يې نه کېږي.
نوموړې زياته کړه: ((موږ چې کله په نورو هېوادونو کې د خلکو مينه له خپلو هنرمندانو سره ګورو نو دلته هېڅ د پرتلې وړ نه ده.))
د هغې په وينا، د بوديجې د کمښت له امله ډېری وخت د کار له کمښت سره مخ کېږي او همدا لامل دی چې له ستونزو سره لاس او ګرېوان دي.
خو سونيا وويل، لا هم هيله منه ده او په دې برخه کې خپلو هڅو ته ادامه ورکوي.
د بلخ د اطلاعاتو او فرهنګ رياست رييس خليق وايي، دوی تل د افغان سينماګرانو قانوني ملاتړ کړی دی.
نوموړي زياته کړه، په افغانستان کې د فلم جوړونې هنر باندې کوم بنديز نه دی لګېدلی، هنرمندان بايد د خپلو ازادو هڅو له لارې د خلکو او سوداګرو پاملرنه د ځان په لور کړي.
هغه د سينماګانو له منځه تلل د فلمي هنر لپاره زيان وباله؛ خو ويې ويل چې د تېرو لسيزو جګړو ډېرې برخې زيانمن کړې دي.
خليق وويل: ((د مجاهدينو له دورې وړاندې د بلخ ولايت په مرکز مزارشريف ښار کې دوه سينماګانې وې او په ځينو ولسواليو کې د فلمونو نندارې لپاره تالارونه جوړ شوي وو خو اوس هېڅ هم نشته دي.))
نوموړي زياته کړه چې د مزارشريف ښار دولتي سينما له منځه يوړل شوې او پر ځای يې بله ودانۍ جوړه شوې ده.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن