شاهين قول اردو: ډېر ژر به شمال کې د طالبانو په څېر داعش ډله هم وځپل شي

مزارشريف (پژواک، ۱۲ ليندۍ ۹۶): د شمال زون د شاهين قول اردو مسوولينو په روان کال کې تر دې دمه د ۳۶۰۰ مخالفينو د وژلو او د ۲۵۰۰ مخالفينو د ټپي کېدو ادعا وکړه.

د يادې قول اردو قوماندان جنرال امان الله مبين، له دغې قول اردو څخه د څه باندې ۶۰۰ سرتېرو په فراغت غونډه کې وويل، په شمال زون کې يې پر دښمن د جګړې ټولې لارې بندې کړې دي.

ده زياته کړه، طالبانو د پېښور شورا په مرسته کوښښ روان کړی و، چې د روان کال په اوږدو کې بايد د شمال زون ځينې برخې سقوط کړي.

د هغه په وينا، دوی يې ټول پلانونه شنډ کړل او د جګړې ټولې لارې يې پرې بندې کړې دي.

جنرال مبين وويل، په دغه زون کې په روان کال کې د وسله والو مخالفينو پر وړاندې لسګونه چاڼيز عمليات تر سره شوي دي.

د ده په خبره، د همدې عملياتو په ترڅ کې يې دښمن ته سخت زيانونه اړولي دي.

هغه وويل، د روان کال په تېرو اتو مياشتو کې يې ۳۶۰۰ وسله وال مخالفين وژلي او ۲۵۰۰ نور يې ټپيان کړي دي.

نوموړي همداراز د ۵۰۰ وسله والو مخالفينو د ژوندي نيولو خبر هم ورکړ.

هغه د شمال زون په جوزجان او فارياب ولايتونو کې د داعش وسله والو شتون تاييد کړ؛ خو ډاډ يې ورکړ چې ډېر ژر به يې د طالبانو په څېر وځپي.