عطامحمدنور : د اوسني حکومت واک له څو کسانو سره دی

مزارشريف (پژواک، ۱۴ مرغومی ۹۶): د بلخ ګوښه شوى والي عطامحمد نور وايي، تل يې هڅه کړې چې د افغانستان نظام صدارتي سيستم ولري.

ولسمشر محمد اشرف غني، څه باندې دوه اوونۍ وړاندې د عطامحمد نور استعفا ومنله او پر ځاى يې انجنير داوود د ياد ولايت لپاره د نوي والي په توګه معرفي کړ، خو نوموړي تر اوسه پورې په رسمي ډول کار نه دى پيل کړى. د ولسمشر ياده پرېکړه تر اوسه پورې د عطامحمد نور او جمعيت ګوند له لوري نه ده منل شوې.

نوموړي چې د مرغومي په ۱۴مه، له ماسپښين وروسته د بلخ ولايت مقام د جلسو په تالار کې د خپلو پلويانو يوې غونډې ته خبرې کولې، يو ځل بيا له تفاهم پرته د اوسني حکومت تر پايه پر خپل والي توب ټينګار وکړ.

هغه د تېر په څېر ګواښ وکړ، که چېرې يې پر وړاندې له زوره کار واخيستل شي، نو له خپل حق څخه به مشروع دفاع وکړي.

نوموړي وويل، د اوسني حکومت واک له څو کسانو سره دی.

ده زياته کړه: ((اوسنی حکومت واجب الاحترام غير مسوول دی، چې چاته د پوښتنې کولو حق هم نه ورکوي.))

د هغه په وينا، له همدې امله يې تل کوښښ کړی، چې قدرت بايد يو شخص سره نه وي او په افقي توګه تقسيم شوی وي.

نوموړي زياته کړه: ((همدا ده چې ما تل د صدارتي سيستم لپاره کوښښ کړی دی.))

هغه اوسنی حکومت د توطيو مرکز وباله او پرې يې د قومونو تر منځ د مخالفت پيدا کېدو تور ولګاوه.

عطامحمد نور له هغه مهاله چې د حکومت له خوا يې د ګوښه کېدو اعلاميه خپره شوې، د نه منلو تر څنګ يې په بلخ کې د مرکزي ادارې پر وړاندې د مخالفت غږ پورته کړی، چې هره ورځ د خپلو پلويانو يوې غونډې ته د ملي وحدت حکومت خلاف څرګندونې کوي.

دغه حالت له تېرو اتلسو ورځو روان دی، خو لا يې هم مرکزي ادارې پر وړاندې کوم ښکاره دريځ نه دی نيولی.