لښکرګاه(پژواک،۱۶سلواغه۹۶): هلمند کې له سلګونو بې ځايه شويو کورنيو سره د ژمنيو توکو د مرستو لړۍ پيل شوه.
د دې ولايت د کډوالو چارو رييس نقيب الله زمريال د سلواغې په ١٦مه خبريالانو ته ووويل چې دغه مرستې د يونيسف ادارې له لوري له څه باندې اووه سوه بې ځايه شويو کورنيو سره ترسره کيږي.
ده وويل چې په دې مرستو کې د پخلنځي د سامان ترڅنګ ٢٠ قلمه نور توکي دي چې نن يې د وېش لړۍ پيل شوه.
دغه راز په يادو مراسمو کې د هلمند مرستيال والي بسم الله روحاني وويل چې مرستندويه ادارې بايد له نورو بې ځايه شويو کورنيو سره هم مرستې وکړي.
ده زياته کړه: (( د ژمي په موسم کې د دغه شان مرستو کول ډېر مهم وي، ځکه خلک ژمني شيانو ته ضرورت لري او زه د يونيسف له ادارې مننه کوم چې دغه مرستې يې وکړې.))
همدارنګه د هلمند د ولايتي شورا غړي بريالي نظري وويل چې د بې ځايه شويو کورنيو سروې په شفاف ډول ترسره شوې ده.
هغه وايي چې د ولايتي شورا غړي د مرستو د وېش له لړۍ څخه جدي څارنه کوي.
د نهرسراج ولسوالۍ يو تن اوسېدونکي ګلبدين وويل چې د جګړو له امله بې ځايه شوي، خو دا يې لومړى ځل دى چې مرستې ترلاسه کوي.
ده وويل: (( کار نشته دى، جګړې مجبوره کړي يو چې مرستې واخلو.))
د يادونې ده چې تر دې وړاندې هم د هلمند د کډوالو چارو رياست له لوري له ١١٥٠٠ بې ځايه شويو کورنيو سره د خوراکي او ژمنيو توکو مرستې ترسره شوي دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن