د کونړ د ولايتي شورا د رييس يو ساتونکى ووژل شو

اسعداباد (پژواک، ٢١ سلواغه ٩٦) : د کونړ د ولايتي شورا د رييس يو ساتونکى د ماين په چاودنه کې وژل شوى دى.

د ولايتي شورا رييس ولايت خان مشواڼي د سلواغې په ٢١مه، پژواک خبري اژانس ته وويل چې دا پېښه پرون تر غرمې وروسته په شلطن ولسوالۍ رامنځته شوې ده.

هغه زياته کړه، دده يو تن ساتونکى له خپل کور څخه د جمعې لمانځه لپاره جومات ته روان و، چې په لاره کې ځاى پر ځاى شوى ماين پرې وچاودېد.

د نوموړي په وينا، په دې چاودنه کې يې ياد ساتونکى ووژل شو او يو بل عام لاروى ټپي شوى دى.

د کونړ امنيه قوماندانۍ هم دا پېښه تاييد کړې ده.

د دې چاودنې مسووليت تر اوسه چا نه دى منلى.