د زابل مسوولين: په شهرصفا کې ٣٤ طالبانو ته مرګ ژوبله اوښتې

کلات (پژواک، ١٨ کب ٩٦): د زابل امنيتي مسوولين وايي، په شهرصفا ولسوالۍ کې د عملياتو پرمهال ١٤ طالبان وژل شوي او شل نور ټپيان دي.

د دې ولايت د امنيت آمر سمونوال غلام جيلاني فراهي، پژواک خبري اژانس ته وويل چې تېره ورځ د ماسپښين له يوې بجې څخه د ماخوستن تر اتو بجو پورې، دوى د شهرصفا ولسوالۍ په اسحاقزي سيمه کې د طالبانو پر ضد عمليات وکړل.

ده زياته کړه، له طالبانو سره په دې نښتو کې ١٤ طالبان وژل شوي چې د ٧ جسدونه له دوى سره دي؛ دغه راز تر شلو زيات وسله وال او دوه پوليس ټپيان دي.

د هغه په وينا، يو سراچه موټر، ٧ موټرسايکلونه، ٤ ميله سپکې او درنې وسلې، ماينونه او ګڼ نور مهمات يې هم له وسله والو نيولي دي.

فراهي وايي، دغې ډلې غوښتل چې د کلات – کندهار ترمنځ  لار ناامنه کړي.

خو طالبانو په دې اړه څه نه دي ويلي.