کندهار کې د ښځو لپاره ځانګړی سوداګريز مرکز پرانيستل شو

کندهار(پژواک، ٢ ورى ٩٧): په کندهار کې د يوې افغان ښځې له خوا د ښځو لپاره ځانګړى سوداګريز مرکز پرانستل شو.

د کندهار ولايت مطبوعاتي دفتر په خبرپاڼه کې راغلي چې دغه مرکز نن  د کندهار د مرستيال والي عبدالحنان منیب له لوري پرانيستل شو.

سرچينه ليکي چې ياد سوداګريز مرکز د يوې کندهارۍ ميرمني ليلا افاق لخوا د ښځو لپاره جوړ شوی دى.

د کندهار مرستيال والي عبدالحنان منیب د افغاني خويندو سوداګريز مرکز د پرانيستلو پر مهال د دغه مرکز د مشرې ليلا افاق څخه مننه وکړه او د هر ډول همکارۍ ډاډ يې ورکړ.

منيب وويل، ولایتي اداره د ښځو د اقتصاد د پرمختګ لپاره هڅي کوي او په همدې موخه يې څو ورځې وړاندې د ښځو د سوداګرۍ خونه هم پرانيستله.

مرستيال والي د ياد سوداګريز مرکز پرانيستل د ښځو د اقتصاد په پرمختګ کي مهم وباله او زياته يې کړه چي دا مرکز به د ښځو د لاسي صنایع ته په بازار موندنه کي هم ګټور تمام شي.

وروسته د افغاني خويندو د سوداګريز مرکز مشري ليلا افاق وويل چي په ياد سوداګريز مرکز کي د ښځو  د اړتيا وړ توکو تر څنګ خیاطي، خوړنځى او جومات هم شته.

 افاق وویل، په ياد مرکز کې يې ۱۲۰ زره امريکايي ډالره پانګونه کړې ده.