زابل کې پنځه طالبان د خپل ماين چاودنې وژلي

کلات (پژواک، ١٣ ورى ٩٧): چارواکي وايي چې پنځه وسله وال طالبان په زابل ولايت کې تر يوه پول لاندې د ماين اېښودو پر مهال د خپل ماين په چاودنه کې وژل شوي دي.

د زابل د والي وياند ګل اسلام سيال د وري په ١٧مه پژواک خبري اژانس ته وويل چې دا پېښه تېره شپه د کابل- کندهار پر لويه لاره د دغه ولايت د شاه جوى ولسوالۍ د زاړه نورک په سيمه کې رامنځته شوې ده.

هغه زياته کړه چې دوى په ياده سيمه کې تر يوه پله لاندې ماين ځاى پر ځاى کاوه چې پرې چاودېدلى او پنځه واړه وژل شوي دي.

د سيال په وينا، دوى تر دې مخکې په ياده سيمه کې يو بل پول هم پر ماين الوځولى و.

د والي وياند وويل چې په چاودنه کې د ماین خښوونکو وسلې هم له منځه تللې دي.

وسله والو طالبانو تر اوسه په دې اړه څه نه دي ويلي.