ولسمشر غني خوست کې يوشمېر پروژې پرانيستې

خوست ښار (پژواک،۲۰ وری ۹۷): ولسمشر محمد اشرف غني د کابينې له يو شمېر وزيرانو سره نن سهار خوست ته ولاړ، يو شمېر پروژې يې پرانيستې او د ځينو د بنسټ ډبرې يې کېښودې.

ولسمشر محمد اشرف غني نن د وري په ٢٠مه،سهار وخته د خوست اسماعيل خېلو او مندوزيو ولسوالۍ کې ملکي هوايي ډګر ته ورسېد او هلته يې ددغه هوايي ډګر لپاره د جوړې شوې ځغاست ليکې  (رن وې) پرانيسته وکړه.

نوموړي همدا ډول په ياد شوي هوايي ډګر کې د رادار او د اطفايي لپاره د ودانيو او د داخلي سړکونو د کار د پيل پرانيسته هم وکړه.

ولسمشر غني له دې وروسته په چورلکه کې په دغه ولسوالۍ کې د برېښنا سب سټېشن ته لاړ او هلته يې د برېښنا د وېش چارو پروژه رسماً پيل کړه.

نوموړي وويل چې ددغې پروژې په بشپړېدو سره به په لومړي سر کې ددغه ولايت ۱۳زره کورنۍ له دايمې برېښنا برخمنې شي.

په ورته وخت کې د خوست ولايت مقام مطبوعاتي مسوول طالب منګل د يادو پرژو د پرانيستې پرمهال پژواک خبري اژانس ته وويل چې پر بشپړو شوو پروژو يو ميليارد او اووه ميليونه افغانۍ لګښت شوی.

نوموړي همدا ډول زياته کړه چې د تازه پيل شوو پروژو لپاره يو ميليارد او ١٨ ميليونه افغانۍ بېلې شوې دي.

ټاکل شوې چې ولسمشر محمداشرف غني به نن د ورځې تر پايه له قومي مشرانو، د ولايتي شورا غړو، مدني فعالانو او ځوانانو سره پر ځانګړو ناستو سربېره نن ماسپېښين په خوست ښار کې يوې ولسي غونډې ته وينا هم وکړي.