د خوست والي د بي بي سي خبريال احمدشاه د قاتلينو د نيولو خبر ورکړ

خوست ښار (پژواک، ۲۰ غويی ۹۷): د خوست والي وايي چې په دغه ولايت کې د بي بي سي خبريال احمدشاه په وژلو کې ښکېل کسان نيول شوي او ډېر ژر به يې عدلي او قضايي ارګانونو ته وسپاري.

والي حکم خان حبيبي چې نن (د غويي ٢٠مه) یې په خوست کې د ټاکنو د عامه پوهاوي يوې غونډې ته خبرې کولې، وويل چې د احمدشاه او همدارنګه د يعقوبيو اډې پر جومات د بريد عاملين نيول شوي دي.

نوموړي په دې اړه ډېر جزئيات ور نه کړل، خو ويې ويل چې د دې دواړو پېښو د نيول شوو عاملينو دوسيې به تر لومړنيو څېړنو وروسته عدلي او قضايي ارګانونو ته ورسپاري او خپله سزا به وويني.

په خوست کې د بي بي سي خبريال احمدشاه تېره اوونۍ په خوست ښار کې داسې مهال د دوو موټرسايکل سپرو له لوري ووژل شو چې پر بايسکيل کور ته پر لاره و.

احمدشاه له تېر يو کال راهيسې په سوېل ختيځو ولايتونو کې د بي بي سي راډيو ټلوېزيون او انلاين لپاره د خبريال په توګه دنده ترسره کوله.

ظاهراً د هغه د وژنې مسووليت کومې ډلې پر غاړه نه دی اخيستی.

همدارنګه د يعقوبيو اډې په جومات کې د رايې ورکوونکو د نوم لیکنې پر يوه مرکز بريد کې چې څلور ورځې وړاندې وشو، لږ تر لږه ۱۷ کسان ووژل شول او ۳۶ نور ټپيان وو.