پلخمري (پژواک، ٢٩ غويى ٩٧) : ځايي چاروکي وايي چې امنيتي ځواکونو نن سهار د بغلان ولايت د تاله و برفک ولسوالۍ او امنيه قوماندانۍ ودانۍ بېرته ونيولې .
په شمال کې د شاهين قول اردو ویاند جګړن محمد حنيف رضايي دغويي په ۲۹ مه پژواک خبري اژانس ته وويل چې ځانګړي امنيتي ځواکونه نن سهار د ولسوالۍ انګړ ته دننه او ولسوالۍ ته څېرمه ټولې امنيتي پوستې يې تر خپل کنټرول لاندې راوستې .
هغه زياته کړه چې افغان ځانګړي ځواکونه هغه مهال ولسوالۍ ته دننه شول چې تېره شپه يې د تور موش په نوم سيمې مهم سنګرونه تر بمبار وروسته ويجاړ او د ولسوالۍ مرکز لور ته يې د پرمختګ لار خلاصه کړه .
د نوموړي په وينا، د ولسوالۍ د بېرته نیولو لومړۍ ورځې جګړې کې د امريکايي ځواکونو هوايي ځواک هم برخه اخيستې وه چې افغان ځمکنیو ځواکونو ته یې دپرمختګ لار هواره کړه .
رضايي په دغې څو ورځنۍ جګړه کې وسله والو طالبانو ته داوښتي ځاني زيان په اړه وويل، چې په دې نښتو کې ٤٢ وسله وال مخالفين وژل شوي ا و ٣٢ تنه نور يې ټپيان دي.
نوموړى زياتوي، چې تر دې دمه يواځې درې افغان سرتېري ټپيان شوي او د ولسوالۍ د بېرته نیولو ټوله جګړه کې ملکي وګړو ته زيان نه دی اوښتی .
د شاهین قول اردو ویاند وايي، وسله وال طالبان اوس مهال د وادو په نوم درې لور ته تښتېدلي او افغان ځواکونه به تر هغه ورپسې وي تر څو د تاله و برفک ټوله ولسوالۍ يې له شتونه پاکه کړې نه وي .
د رضايي په وينا، څلور عرادې هغه رېنجر موټر چې وسله والو طالبانو نيولي و، هم بېرته ترلاسه شوي او څلو ر هاموې موټر د طالبانو له لوري د سيمې د پرېښودو پر مهال سوځول شوي چې په بشپړ ډول له منځه تللي دي .
د بغلان د امنيه قوماندانۍ ویاند ذبيح الله شجاع هم د تاله و برفک ولسوالۍ دبېرته نیولو خبر تاييدوي، خو د وروستۍ مرګ ژوبلې په اړه بې خبري ښيي .
وسله والو طالبانو تر دې دمه دتاله و برفک ولسوالۍ د بېرته له لاسه وتلو او ورته د اوښتې مرګ ژوبلې په اړه څه نه دي ویلي .
تاله و برفک ولسوالۍ لس ورځې وړاندې وسله والو طالبانو د يوه ډله ييز بريد په ترڅ کې ونيوله،دغه ولسوالۍ په تېرو دوو کلونو کې دا څلورم ځل دی چې د وسله والو طالبانو او افغان ځواکونو ترمنځ لاس په لاس کېږي .
login or register a new account.
