د پل علم ښار يوه لېسه د نوم ليکنې د مرکز له امله تړل شوې

پل علم (پژواک،٢٩ غویى۹۷): د لوګر ولايت په مرکز پل علم ښار کې يو ښوونځى د زده کوونکو پر مخ تر هغه وروسته تړل شوى، چې هلته د رايې ورکوونکو د نوم ليکنې مرکز جوړ شوى دى.

دغه ښوونځى د پل علم ښار اړونده د کډوالو په ښار ګوټي کې موقعيت لري، له کومې ورځې چې هلته د نوم ليکنې مرکز جوړ شوى، يو زده کوونکى هم زده کړې ته نه ورځي.

ددې ولايت د پوهنی ریاست ویاند شاهپورعرب پژواک خبري اژانس ته وويل، کله چی د ټاکنو کمېسيون په ښوونځیوکی د نوم لیکنې مرکزونه جوړ کړ او د وسله والو طالبانو له لوري په دغه ولایت کې د نوم لیکنې په ځینو مرکزونو بریدونه وشول؛ نو د کډوالوښارګوټي لېسې دروازه د زده کوونکو پر مخ تړل شوې ده.

هغه زياته کړه، د لېسې د تړل کېدو له امله ١١ سوه زده کوونکي له زده کړو محروم پاتې شوي دي.

عرب وايي چې په دې اړه يې خپل شکايت د ټاکنو کمېسيون سره شريک کړى دى.

نوموړی وایي، يو شمېر هغه ښوونځي چې د ټاکنو د نوم لیکنې مرکزونه په کې فعال دي تر امنیتي ګواښ لاندې دي او وېره شته چې هغه هم وتړل شي.

د کډوالو د ښارګوټي يو تن قومي مشر ملک شمس الدین پژواک ته وویل چې شاوخوا یوه میاشت کېږي چې دغه لېسه تړل شوې ده.

هغه وایي: (( موږ د ټاکنو د ملي پروسې ملاتړي یو، خو که د نوم لیکنې مرکز له ښوونځي څخه کوم بل ځای ته انتقال شي، ځکه هلته واړه ماشومان او ځوانان د زده کړو په موخه ورتلل، خو له کومې ورځې چی د نوم لیکنې پر مرکزونو بریدونه وشول؛ نو زده کوونکي ښوونځي ته نه ځي او تړل  شوى .))

د لوګر د ولایتي شورا مرستیال عبدالولي وکیل هم له امنیتی ادارو وغوښتل چې د نوم لیکنې د مرکزونو امنیت  وساتي او یا دې هم دغه مرکزونه له ښوونځیو څخه وایستل شي.

د هغه په وينا، دغه کار  د پوهنې پر بهير ناوړه اغېزه کړې ده.

د یادونې ده چی په تېرو دوو اوونیو کې په پل علم کې د نوم ليکنې پر دوو مرکزونو وسله وال برید او د ماین چاودنې شوې دي.

دا په داسې حال کې ده چې په يو شمېر نورو ولايتونو کې هم دا ستونزه شته او ګڼ شمېر ښوونځي تړل شوي دي.