په غزني کې د ماين چاودنې له امله شپږ ملکي وګړي ووژل شول

غزني ښار(پژواک،٢١غبرګولى٩٧): د غزني په جغتو ولسوالۍ کې د ماين چاودنې له امله شپږ ملکي وګړي وژل شوي او درې نور ټپيان دي.

د غزني د والي وياند محمد عارف نوري د غبرګولي په ٢١مه پژواک خبري اژانس ته وويل چې نن له غرمې مخکې شاوخوا لس بجې د جغتو ولسوالۍ قياک سيمه کې د ملکي وګړو پر تونس موټر د ماين چاودنه شوې ده.

هغه وايي چې په دې چاودنه کې شپږ ملکي وګړي وژل شوي او درې نور ټپيان دي.

دغه راز د غزني د ولايتي روغتون رييس بازمحمد همت هم پژواک ته وويل چې له يادې پېښې څخه دوى ته شپږ مړي او درې ټپيان انتقال شوي دي.

هغه وويل چې د ټپيانو روغتيايي حالت سم نه دى.

تراوسه پورې ددې چاودنې مسووليت چا نه دى منلى  .