پلخمري (پژواک ٩ چنګاښ ٩٧) : د بغلان ولايت له مرکز پلخمري ښار څخه هم د سوله غوښتونکو لس کسيزه ډله پلې کابل ته روانه شوه .
تر دې مخکې له هلمند او پېښور څخه هم د سولې پلي کاروانونه کابل ته رسېدلي او د کونړ کاروان کابل ته پر لاره دى.
د بغلان ولايت دغه لس ځوانان چې د سولې په اړه ليکل شوي شعارونه له ځانه سره لېږدوي وايي ، کابل کې به تر ارګه ولاړ شي او له ولسمشرڅخه به په هېواد کې د سولې خبرو د ژر پيل غوښتنه وکړي .
ددې کاروان مشر محمد اسماعیل دچنګاښ په ۹ مه له پلخمري څخه د روانېدلو پر مهال پژواک خبري اژانس ته وویل : (( موږ نن له بغلان څخه کابل ته د سولې غوښتو په نيت روان شو ، له هېچا سره مو خبرې نه دي کړي او نه هم دچا په غوښتنه روان شوي يو ، سوله مو هدف ده او انشا الله دغه هدف ته به ځان رسوو .))
هغه زياته کړه، ځوانان به دسولې دغه سپیڅلی غږ د ارګ تر دروازې رسوي اوهلته به له ولسمشر سره تر ليدو وروسته په هېواد کې د سولې خبرو د ژر پيلېدو غوښتنې کوي.
دى وايي، د هېڅ سياسي ګوند غړي نه دي او نه هم د کوم بهرني هېواد په غوښتنه يې دا کار پيل کړى، يواځې د حکومت او وسله والو طالبانو ترمنځ سوله غواړي.
د ياد کاروان بل غړي محمد بلال هم پژواک ته وویل چې له جنګ څخه ستړي شوي او د سولې غوښتو لپاره کابل ته روان شول.
د بغلان د ولایتي شورا مرستيال وکيل شمس الحق بارکزي پژواک اژانس ته وويل، ولس او چارواکي بايد له هر هغه بهير څخه ملاتړ وکړي چې د سولې لپاره ترسره کېږي.
بارکزي وویل، دبغلان ټول ولس باید راغونډ او له وسله والو طالبانو څخه دسولې خبرو دپیل او اوربند غوښتنې وکړي
د يادونې ده چې وسله والو طالبانو د سولې له دغو کاروانونو سره مخالفت ښودلى او دا يې د بهرنيانو په اشاره حرکتونه بللي دي.
login or register a new account.
