د لوګر په بره کي برک کې د نجونو ښوونځي تړل شوي

پل علم(پژواک،١٣وږى٩٧): د لوګر سيمه ييز چارواکي وايي چې وسله والو طالبانو بره کي برک ولسوالۍ کې ښځينه ښوونکو ته ښوونځي ته د نه تګ امر کړى چې له امله يې د نجونو ښوونځي تړل شوي دي.

د بره کي برک ولسوالۍ سرپرست عين الدين امين خېل د وږي په ١٣مه پژواک خبري اژانس ته وويل چې له تېرو درېيو ورځو راهيسې له شپږم ټولګي څخه پورته د نجونو ښوونځيو استادان ښوونځي ته نه ورځي.

هغه وايي:((طالبانو دې استادانو ته ويلي چې مکتب ته لاړې نه شي که چېرې لاړې شي وبه وژل شي ،نو همدا دى چې اوس د نجونو ښوونځي بند دي.))

سرپرست ولسوال وايي چې د يادې ستونزې د حل په موخه يې له قومي مشرانو او ديني عالمانو سره خبرې کړې دي.

امين خېل وايي چې د ښوونځيو د تړل کېدو دغه موضوع يې د ولايت له مقام او پوهنې رياست سره هم شريکه کړې ده.

د دې ولسوالۍ د بره کي راجان سيمې قومي مشر سيداغا پژواک ته وويل چې د طالبانو له ګواښ وروسته ښځينه ښوونکي او زده کوونکي ښوونځيو ته نه ورځي او ښوونځي تړل شوي دي.

د لوګر د ولايتي شورا مرستيال عبدالولي وکيل هم ياده موضوع تاييد کړه او ويې ويل چې طالبانو دغه کار د تعليمي کيفيت د ښه والي لپاره کړى دى.

ده زياته کړه:((طالبان ادعا کوي چې بره کي برک کې له شپږم نه پورته ټول ښوونځي خيالي دي، نجونې نه وي خو اخر د کال کې فارغېږي، نوځکه دوى ښوونځي تړلي دي.))

وکيل وايي چې ولايتي شورا د يادې ستونزې د حل لپاره هلې ځلې پيل کړې دي.

دا په داسې حال کې ده چې د لوګر د ولايت مقام او د پوهنې رياست په دې اړه له څه ويلو ډډه وکړه.

د اړوندې موضوع په اړه د وسله والو طالبانو وياند ذبيح الله مجاهد پژواک ته وويل چې د دې موضوع په اړه تر اوسه معلومات نه لري.

د يادونې ده چې لوګر کې ٣٠٧  ښوونيز مرکزونه دي چې د ٤٠ زره نجونو په ګډون ١٥٠ زره کسان په کې زده کړې کوي.