پکتیکا کې د هاوان مرمۍ لګېدو له امله د یوې کورنۍ اته کسان وژل شوي

ښرنه (پژواک، ٢٦ وږى ٩٧): د پکتيکا په وړممۍ ولسوالۍ کې د هاوان مرمۍ لګېدو له امله د ښځو او ماشومانو په ګډون د يوې کورنۍ اته غړي وژل شوي او درې نور ټپيان دي.

د پکتيکا امنيه قوماندان مل پاسوال غلام سخي روغ لېوني د وږي په ٢٦مه پژواک خبري اژانس ته وويل چې تېره شپه د وړممۍ ولسوالۍ په سيدخېلو سيمه کې پر يوه کور د هاوان مرمۍ لګېدلې ده.

هغه وايي چې په دې پېښه کې د ښځو او ماشومانو په ګډون اته کسان وژل شوي او درې نور ټپيان دي.

همدارنګه د دې ولسوالۍ يوه اوسېدونکي خان محمد پژواک ته وويل چې په دې پېښه کې شپږ کسان وژل شوي او درې نور ټپيان دي.

د هغه په وينا، وژل شوو کې څلور ماشومان، يوه ښځه او يو سړى شامل دي.

نوموړي زياتوي چې په دې ولسوالۍ کې د روغتيايي مرکزونو د نه شتون له امله ټپيان تر اوسه په کور کې پراته دي.

دغه راز د پکتيکا ولايتي شورا پخواني غړي عبدالغني پکتين پژواک ته وويل چې تېره شپه وړممۍ کې د افغان امنيتي ځواکونو او طالبانو ترمنځ جګړه شوې ده.

د پکتين د معلوماتو له مخې، د همدې جګړې په ترڅ کې د طالبانو له لوري د هاوان توغول شوې يوه مرمۍ د محمد عظيم پر کور لګېدلې چې مرګ ژوبله يې رامنځته کړې ده.

وسله والو طالبانو تر اوسه په دې اړه څه نه دي ويلي.