لښکرګاه(پژواک،٤تله٩٧): د هلمند د دښتو او غصب شويو ځمکو يو شمېر کروندګرو د کوکنار داسې تخمونه ترلاسه کړي چې د کال د يو فصل پرځاى، په څلورو فصلونو کې کرل کېږي او څلور ځلې حاصلات ورکوي.
د هلمند د ګرشک ولسوالۍ د سامينار دښتې يو تن کروندګر شاه محمود د تلې په څلورمه پژواک خبري اژانس ته وويل چې په درې جريبه ځمکه کې يې کوکنار کرلي دي.
هغه وويل: (( پخوا مو په مني کې کرل او پسرلي کې به مو ټولول چې د کال يې يو ځل حاصل ورکاوه، خو اوس مو داسې تخمونه پيدا کړي چې دکال په څلورو فصلونو کې کرل کېږي او څلور ځلې حاصل ورکوي.))
شاه محمود ونه ويل چې دغه تخمونه يې له کوم ځاى څخه ترلاسه کړي، خو زياته يې کړه چې په دې وروستيو کې د ترياکو نرخ ټيټ شوى او دوى ډېره ګټه نه شي ترلاسه کولى.
د هغه د معلوماتو له مخې، يو من (څلورنيم کيلو) ترياک دوى دا مهال په ٢٠ زره کلدارې خرڅوي چې ډېرې کمې پيسې دي.
نوموړي وايي چې د سولري برېښنا په وسيله خپل ځمکې خړوبوي او دا مهال يې د کوکنارو فصل حاصل ته په رسېدو دى.
دغه راز د دې سيمې يو بل کروندګر د نوم له اخيستو پرته پژواک ته وويل: ((له یوې خوا د تریاکو قېمتونه ټیټ شوي ، له بلې خوا د طالبانو او حکومت تر واک لاندې سیمو کې د کوکنارو د کر پر سر یو اندازه پيسې حکومت او طالبانو ته ورکوو که ور يې نه کړو بيا مو د کوکنارو کرلو ته نه پرېږدي.))
ده وويل چې د سامينار سيمې امنيتي سرتېرو ته يې يوه اندازه پيسې ورکړي، نو ځکه په ډاډه زړه يې کوکنار کرلي او اوس حاصل ته هم رسېدلي دي.
د اړوندې موضوع په اړه د ګرشک ولسوال محمد سليم رودي پژواک ته وويل چې په دې وروستيو کې يو شمېر کروندګر د يو فصل پرځاى په څلورو فصلونو کې کوکنار کري چې پر امنيتي حالاتو يې منفي اغېزې کړې دي.
هغه زياته کړه: (( دا زموږ مسوولیت نه دی چې مخه يې ونيسو، د نشه يي توکو پر وړاندې د مبارزې اړوند ادارې يې بايد د مخنيوي لپاره کار وکړي، له منځه دې يوسي او په بديلو لارو دې هم فکر وکړي.))
دغه راز د هلمند د نشه يي توکو پر وړاندې د مبارزې رييس سيداحمد ورور پژواک ته وويل چې تېرکال يو فصله کوکنار د دې ولايت په ١٤٠ زره هکتاره ځمکه کې کرل شوي وو، خو د څلور فصله کوکنارو په اړه تر اوسه سروې نه ده شوې.
ورور وايي چې د څلور فصله کوکنار په اړه يې وزارت ته معلومات ورکړي، خو د نا امنيو او بوديجې د کموالي له امله يې پر وړاندې کمپاين نه شي تر سره کولى.
نوموړي هيله وښوده چې سږ کال به د وچکالۍ له امله د کوکنارو په کښت کې د پام وړ کموالى راشي.
هغه دا هم وويل چې د کوکنارو په کرلو کې وسله وال مخالفين او مافيايي کړۍ لاس لري، ځکه وسله وال مخالفين د دولت تر واک لاندې سيمو کې هم له کوکنارو څخه عشر او زکات ترلاسه کوي.
په دې اړه د هلمند والي محمد ياسين خان پژواک ته وويل چې د دولت تر واک لاندې يواځې په هغو سيمو کې کوکنار کرل کېږي چې امنيتي وضعيت يې ښه نه دى.
والي وويل چې وسله وال مخالفين د کوکنارو له کښت څخه عوايد ترلاسه کوي، نو ځکه حکومت يې د له منځه وړلو لپاره جدي مبارزه کوي.
د يادونې ده چې افغانستان د نړۍ نږدې ٩٠ سلنه نشه يي توکي توليدوي چې ډېره برخه يې له هلمند ولايت څخه ترلاسه کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن