د ملي امنیت سلاکار د ناامنه ولسوالیو د وضعیت پر ښه کېدو ټينګار وکړ

کابل (پژواک ١٣ لړم ٩٧): د هېواد د ملي امنیت سلاکار له ګواښ سره د مخامخ ولسوالیو د وضعیت پر ښه کېدو ټينګار وکړ.

د ملي امنيت شورا له دفتر څخه پژواک خبري اژانس ته په رالېږل شوې خبرپاڼه کې راغلي چې د امنیتي او دفاعي سکټور رهبرۍ جلسې نن ماښام د فراه، ارزګان، سمنګان، فاریاب او ننګرهار ولایتونو په امنیتي وضعیت او پر خپل وخت د هېواد امنیتي او  دفاعي ځواکونو ته د تجهیزاتو په رسېدو بحث وکړ.

سرچينه کاږي، دغه جلسه چې د هېواد د ملي امنیت سلاکار ډاکټر حمدالله محب په مشرۍ او د امنیتي او  دفاعي سکټور د وزیرانو په حضور کې د ملي امنیت شورا د کنفرانسونو په تالار کې جوړه شوه، سترو امنیتي او دفاعي مسوولینو خپل امنیتي او استخباراتي راپورونه وړاندې کړل.

سرچينه زياتوي، د هېواد د ملي امنیت سلاکار له ګواښ سره د مخامخ ولسوالیو د وضعیت پر ښه کېدو ټينګار وکړ او سپارښتنه يې وکړه، چې امنیتي او دفاعي ارګانونه دې په همغږۍ او هر اخیز ډول په دې برخه کې مشترک اقدامات تر لاس لاندې ونیسي.