د پکتیکا په مرکز ښرنه کې د ګاز نیولو له امله پنځه کسان مړه شوي

ښرنه (پژواک، ١٦ لړم ٩٧): د پکتيکا په مرکز ښرنه کې د ګاز نیونې له امله يوه ښځه او پنځه ماشومان مړه شوي دي.

د یادې کورنۍ يوه غړي نورالله د لړم په ١٦مه پژواک خپري اژانس ته وويل چې تېره شپه د دوى په کور کې د ګاز نیولو له امله څو کسان مړه شوي دي.

هغه وايې: ((يوې ښځې جامې وتو کولې چې د ګاز ډبې ګاز وتلی، ټوله کوټه يې نيولې او څو تنه يې مړه کړي دي.))

د نوموړي د معلوماتو له مخې، په دې پېښه کې يوه ښځه او پنځه ماشومان وژل شوي چې ټول د يوې کورنۍ غړي دي.

دغه راز د مرکز ښرنې د ملکي روغتون يوې سرچينې پژواک ته وويل چې له يادې پېښې ورته د څلورو ماشومانو او يوې ښځې مړي ور وړل شوي دي.

د يادونې ده، شاوخوا يو کال وړاندې هم په پکتيکا کې د ورته پېښې له امله يوه ناوې او زوم د واده په لومړۍ شپه مړه شوي وو.