اعتراض کوونکي: د بغلان په خوست او مرکزي بغلان کارول شوې رایې باید حساب شي

پلخمري (پژواک، ٣ ليندۍ ٩٧): د بغلان ولايت د خوست او مرکزي بغلان ولسواليو سلګونو اوسېدونکي د ټاکنو کمېسيون له چارواکو غوښتنه وکړه چې د دوى له لوري کارول شوې رايې بايد حساب شي.

د يادو ولسواليو سلګونه اوسېدونکي نن مرکز پلخمري ته راغلي وو او د خپل اعتراض په ترڅ کې يې له والي او نورو چارواکو سره هم وليدل.

د اعتراض کوونکو له ډلې قومي مشر عبدالحکیم نورزي وویل چې په بغلان ولايت کې کارول شوې ټولې رايې بايد حساب شي.

هغه وايي: ((د بغلان خلکو ١٣ شهيدان ورکړي دي، موږ د سر په قيمت رايه ورکړې ده، موږ غواړو چې ټولې رايې بايد حساب شي، په يو او بل نوم بايد رايې باطلې اعلان نه شي.))

نوموړي زياتوي، که چېرې کارول شوې رايې باطلې اعلان شي، نو د بغلان امنيتي وضعيت به هم ډېر کړکېچن شي.

همدارنګه بل اعتراض کوونکي جاوېد ولي زاده وویل: ((موږ له کارول شوو ټولو رایو د دفاع په خاطر راغونډ شوي یو، چې والي ووینو څو د ټاکنو کمېسیون د ځینو سیمو  پاکې رایې د ناپاکو په پلمه باطلې نه کړي.))

ولي زاده تور پورې کړ  چې د بغلان د ټاکنو کمېسیون د رایو د شمېر بشپړ مدیریت نه شي کولای او امکان لري چې ځيني کسان خپلې ناپاکې رايې د ټوپک په زور پرې پاکې کړي.

يو شمېر نورو اعتراض کوونکو هم ورته څرګندونې وکړې.

د غونډې په پاى کې د بغلان والي عبدالحي نعمتي وويل، کمېسيون مکلف دى خلکو ته د ټاکنو له قانون او طرزالعمل سره سم قانع کوونکی ځواب ورکړي.

login or register a new account.