لښکرګاه(پژواک، ٩ ليندۍ ٩٧): د سولې د ولسي حرکت غړي غواړي چې له کابل څخه بېرته هلمند ته ولاړ شي، خلکو ته د خپلو لاسته راوړنو په اړه معلومات ورکړي او د يو نوي طرزالعمل له مخې د سولې لپاره هلې ځلې پيل کړي.
د هلمند ولايت په مرکز لښکرګاه کې يو شمېر ځوانان يو ځل بيا پر هماغه ځاى را ټول شوي، له کوم ځاى څخه چې نهه مياشتې وړاندې د سولې ولسي حرکت پيل شوى و.
دغه ځوانان غواړي چې يو ځل بيا پر پخواني ځاى د سولې لپاره خېمه ودروي او د سولې لپاره نوې هلې ځلې پيل کړي.
د دغې حرکت يو تن تنظموونکي فرهاد داوري د ليندۍ په نهمه پژواک خبري اژانس ته وويل چې د راتلوونکې پنجشنبې په ورځ به د خلکو او د سولې د ولسي حرکت غړو يوه لويه غونډه په دې خېمه کې جوړه شي.
هغه وايي: (( د سولې د ولسي حرکت غړي به د خپلو لاسته راړونو په اړه خلکو ته معلومات ورکړي او هم به د يو نوي طرزالعمل له مخې د سولې راتګ لپاره نوې هلې ځلې پيل کړي.))
د يادونې ده چې د سولې د ولسي حرکت غړو د روان کال د غويي په مياشت کې له لښکرګاه څخه کابل ته پلى مزل وکړ چې په ٣٨ ورځو کې کابل ته ورسېدل.
يادو کسانو په کابل کې د ځينو سفارتونو مخې ته خېمې و وهلې او له هغه وروسته بلخ ولايت ته لوڅې پښې لاړل، ترڅو ټولو ته د سولې پيغام ورسوي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن