تعقيبي-کندهار (پژواک، ٢٦ ليندۍ ٩٧) : په کندهار ولايت کې ديوې ترافيکي پېښې له امله٣ تنه مړه او ٣٢ ټپيان شوي دي.
د کندهار د ترافیکو مدیر سمونوال عبدالحمید وايي، شاوخوا نیم ساعت مخکې د دامان ولسوالۍ د اخند صاحب په سیمه کې یو مسافر وړونکی بس موټر چې له کابل څخه د کندهار پر لور روان و، له یوه ټېلر موټر سره چې د کابل پر لور روان و، ټکر کړی دی.
هغه زياته کړه، په دغه ترافیکي پېښه کې ۲ مړه شوي او ۱۷ تنه نور ټپيان شوي. دی وایي، د ترافیک پولیسو یوه ډله د موضوع د څېړنې لپاره سیمې ته تللې ده.
خو د کندهار د والي ویاند عزیز احمد عزیزي وايي چې په دې پېښه کې درې تنه مړه شوي او ٣٢ نور ټپيان شوي دي.
هغه وايي چې د مړو شوو درېیو تنو له ډلې یوه يې مېرمن او دوه نارینه دي او دغه راز په ټپيانو کې هم اووه مېرمنې او درې ماشومان شامل دي.
ده وویل چې د پېښې ټپيان د کندهار میرویس روغتون ته رسول شوي او د ترافیکو مدیریت د دغې ترافیکي پېښې څېړنه پيل کړې ده.
همدارنګه د کندهار د میرویس روغتون یو ډاکټر وايي، روغتون ته ۳۲ ټپيان ور وړل شوي چې د ځینو ټپونه ژور دي.
login or register a new account.
