ښرنه کې د ۶۰ میلیونه افغانیو په لګښت جامع جومات جوړېږي

ښرنه (پژواک، ٤ مرغومى ٩٧): د پکتيکا په مرکز ښرنه کې د ٦٠ ميليونه افغانیو په لګښت د يو ستر جومات جوړېدو چارې پيل شوې چې پر يو وخت به زرګونه کسان په کې لمونځ کولاى شي.

د اړوندې موضوع په اړه نیول شوو مراسمو ته د پکتيکا والي الياس وحدت وويل چې دغه جامع جومات په مرکز ښرنه کې يوې مدرسې ته څېرمه جوړېږي.

ده زياته کړه چې جومات به د ولسمشر محمد اشرف غني له ژمنې سره سم د يو کال په موده کې جوړ شي.

نوموړي وويل چې جومات ته څېرمه د فاتحې اخيستنې يو لوى صالون هم جوړېږي چې ٤٠ متره به يې اوږدوالى او ٣٠ به يې سور وي.

وحدت زياته کړه: ((دغه جومات عمومي سړک ته نږدې موقعيت لري چې د ښرنې سربېره به د يو شمېر ولسواليو اوسېدونکي هم په کې لمونځ کوي.))

په دې غونډه کې د مرکز ښرنې يوه قومي مشر حاجي عبدالحي وويل چې د جومات لپاره ځمکه د خلکو له لوري وقف شوې ده.

دغه راز بل قومي مشر وکيل بادشاه خان وويل چې د لومړي ځل لپاره په مرکز ښرنه کې په دې کچه لوى جومات جوړېږي.

هغه وايي: ((ښرنه کې جوماتونه کم دي، د اختر په لمونځونو کې خلک نه ځايېدل دا ډېر ښه کار شو چې دومره لوى جومات جوړېږي.))

د نوموړي د معلوماتو له مخې، قومي مشرانو د دغه جومات لپاره پنځوس جريبه ځمکه وقف کړې ده.

د يادونې ده، له دې مخکې د ښرنې اوسېدونکو پر حکومت نيوکې کړې وې چې جوماتونو ته اړينه پاملرنه نه کوي.