بغلان: د والیبال میدان کې چاودنې څلور کسان وژلي او شل نور ټپیان دي

پلخمري (پژواک، ٦ سلواغه ٩٧): د بغلان د تاله برفک ولسوالۍ د واليبال په ميدان کې چاودنې څلور ملکي وګړي وژلي او ٢٠ نور يې ټپيان کړي دي.

د تاله برفک ولسوال عبدالاحد برفکي د سلواغې په ٦مه پژواک خبري اژانس ته وويل چې تېره ورځ نږدې ماښام د برفک سيمې د واليبال په ميدان کې چاودنه شوې ده.

هغه وايي چې په دې پېښه کې څلور ملکي وګړي ووژل شول او ٢٠ نور ټپيان دي.

د نوموړي په وینا: ((د چاودنې اصلي لامل تر اوسه معلوم نه دى؛ ځکه دغه سيمه د طالبانو په کنټرول کې ده.))

په دې اړه د بغلان د عامې روغتيا رياست مرستيال ډاکتر عبدالحليم غفاري پژواک ته وويل چې له دې پېښې څلور مړي او پنځه ټپيان ور وړل شوي دي.

د هغه د معلوماتو له مخې، په ټپيانو او مړو کې تنکي ځوانان هم شامل دي.

وسله والو طالبانو تر اوسه په دې اړه څه نه دي ويلي.

د يادونې ده، تاله برفک د بغلان د نا امنو ولسواليو له ډلې ده چې ډېرى وخت په کې د افغان امنيتي ځواکونو او وسله والو طالبانو ترمنځ نښتې کېږي.