غزني کې د طالبانو له يوه زندان څخه نهه تنه را خوشې کړاى شول

غزني ښار(پژواک، ١٤ غبرګولى ٩٨): د غزني حکومتي مسوولين وايي چې ځانګړو ځواکونو په ګېرو ولسوالۍ کې د طالبانو يو زندان مات کړى او نهه تنه يې ترې را خوشې کړي دي.

د غزني د والي وياند محمد عارف نوري د غبرګولي په ١٤مه پژواک خبري اژانس ته وويل چې تېره شپه ځانګړو ځواکونو د ګيرو ولسوالۍ د عزمت او امين کلا ترمنځ سيمو کې د طالبانو پر يوه زندان عمليات کړي دي.

هغه وايي چې د دغو عملياتو په ترڅ کې د څلورو ملکي وګړو په ګډون نهه تنه را خوشې کړاى شوي دي.

نوري زياتوي: ((دغه کسان يوې هديرې ته څېرمه په يوه زندان کې ساتل کيدل چې څلور يې ملکي وګړي او پنځه نور يې امنيتي سرتيري دي.))

د نوموړي د معلوماتو له مخې په دغو عملياتو کې چاته مرګ ژوبله نه ده اوښتې.

بل لورته وسله والو طالبانو تر اوسه په دې اړه څه نه دي ويلي.

د يادونې وړ ده چې تر دې وړاندې هم امنيتي ځواکونو په بيلابيلو سيمو کې د طالبانو پر زندانونو عمليات کړي او يو شمېر کسان يې ترې را خوشې کړي دي.