خوست ښار(پژواک، ۵ چنګاښ ۹۸): د خوست امنيتي مسوولين وايي چې په دې ولايت کې د امنيتي ځواکونو او وسله والو طالبانو ترمنځ جګړه شوې چې ٩ وسله وال په کې وژل شوي دي.
د خوست امنيه قوماندانۍ مطبوعاتي مسوول عادل حيدر پژواک خبري اژانس ته وويل چې دغه جګړه نن غرمه مهال شاوخوا يوولس بجې د دې ولايت باک ولسوالۍ په شمل خېلو، سپیرکۍ او ميلۍ په سيمو کې کې شوې ده.
ده زياته کړه، امنيتي ځواکونه په ګزمه بوخت وو چې وسله والو طالبانو پرې د سپکو او درنو وسلو بريد وکړ.
د هغه په وينا، د بريد په پايله کې امنيتي ځواکونو ته کوم زيان نه دی اوښتی، خو په ځوابي ډزو کې ۹ وسله وال طالبان ووژل شوي، چې د درېيو جسدونه يې د جګړې په سيمه کې پاتې دي.
حيدر وايي، د پېښې په ځای کې يوه پيکا او دوه کلاشينکوفونه هم د ملي امنيتي ځواکونو لاس ته ورغلي دي.
وسله والو طالبانو تراوسه د دغې پېښې په اړه رسنيو ته څه نه دي ويلي.
login or register a new account.
