د ايبک ښار په يوه جومات کې د چاودنې له امله ١٥ کسان ټپيان شول

ايبک (پژواک، ٧ چنګاښ ٩٨): د سمنګانو ولايت د مرکز ايبک ښار په يوه جامع جومات کې چاودنه شوې چې د ملا امام په ګډون يې ١٥ تنه ټپيان کړي دي.

د پېښې يو تن عيني شاهد نقيب الله شريفي د چنګاښ په اوومه پژواک خبري اژانس ته وويل چې نن شاوخوا يوه بجه د کارته مجاهد په جامع کې چاودنه شوې ده.

هغه وايي: ((کله چې ملا امام عبدالباقي له خپله ځايه پورته شو نو چاودنه رامنځته شوه.))

نوموړى وايي چې په دغه پېښه کې څو تنه ټپيان شوي چې د نورو لمونځ کوونکي له لوري روغتون ته انتقال شوي دي.

د سمنګان د ولايتي روغتون نوکريوال ډاکټر عبدالهادي محمدي پژواک ته وويل چې له يادې پېښې ١٥ تنه ټپيان روغتون ته انتقال شوي دي.

همدارنګه د ايبک ښار د لومړۍ حوزې د تروريزم پر وړاندې د مبارزې مدير لومړي څارن سيد عبدالعظيم سادات پژواک ته وويل چې په جومات کې چاودنه شوې او ١٥ تنه په کې ټپيان شوي دي.

هغه وايي چې ماين د ملا امام تر څوکۍ لاندې ځاى پرځاى شوى و چې چاودنه يې کړې ده.

د هغه په وينا، ددې پېښې په تور تر اوسه څوک نه دي نيول شوي، خو په اړه يې پلټنې روانې دي.

ددې پېښې مسووليت تر اوسه چا نه دى منلى.