بغلان کې د ښځو او ماشومانو په ګډون شپږو کسانو ته مرګ ژوبله اوښتې

پلخمری (پژواک، ۱۳ چنګاښ  ۹۸): په بغلان کې پر يوه کور هوايي بريد شوى چې له امله يې دوه ښځې وژل شوې او د ماشومانو په ګډون څلور نور کسان ټپيان دي.

د بغلان د مرکز پلخمري د ډنډ شهاب الدين سيمې اوسېدونکي غلام حيدرخان پژواک خبري اژانس ته وويل چې نن له غرمې مخکې يوې الوتکې د ظاهرخان پر کور بريد کړى دى.

هغه وايي چې په دغه بريد کې دوه ښځې وژل شوې او د درېيو ماشومانو په ګډون څلور تنه نور ټپيان شوي دي.

دغه راز د پلخمري ملکي روغتون سرطبيب ډاکټر محمد انور وردګ پژواک ته وويل چې له يادې پېښې د يوې ښځې جسد او پنځه ښځې په ټپي حالت کې روغتون ته انتقال شوي دي.

ده زياته کړه: ((د دوو تنو وضعيت خراب و، هغه مو پلخمري روغتون ته ولېږل، پاتې نور يې دلته موږ تر درملنې لاندې نيولي دي.))

بل لور ته د بغلان د امنيې قوماندانۍ وياند احمد جاوېد بشارت پژواک ته وويل چې د دې پېښې په اړه تر اوسه دوى ته خبر نه دى ورکړل شوى او په اړه به يې پلټنې وکړي.

د يادونې ده، تر دې وړاندې هم د هوايي بمباريو پر مهال ملکي وګړو ته مرګ ژوبله اوښتې ده.