د ولسمشريزو ټاکنو د بايوميـټريک ماشينونو لومړۍ محموله کابل ته ورسېدله

کابل (پژواک، ١٨ زمرى ٩٨) : د ولسمشريزو ټاکنو لپاره د بايو ميټريک ماشينونو لومړۍ محموله کابل ته رسېدلې ده.

د ټاکنو کميسيون د دارالانشاء رييس حبيب الرحمن ننګ وايي، چې ډېر ژر به دغه ماشينونه په مرکز کابل او ولاياتو ټاکنيزو مرکزونو ته ولېـږل شي.

هغه زياته کړه، چې ددې ترڅنګ د احصايې د مرکزي ادارې لخوا هم ١٨ زره د بايوميـټريک ماشينونه کميسيون ته لېـږول شوي او تر ترميم وروسته به ترې استفاده وش.

ننګ وايي، چې له يوې بهرنۍ کمپنۍ سره د ١٧  زره نويو بايوميټريک ماشينونو قرارداد شوى، چې لومړۍ محموله يې پرون کابل ته رسېدلې او ټاکل شوې ده، چې نور يې نن ورسېږي.

ټاکل شوې ده، چې ولسمشريزې ټاکنې د روان لمريز کال د تلې په شپږمه ترسره شي.