کابل (پژواک، ٢٠ زمرى ٩٨): وسله والو طالبانو اعلان کړی چې د لوى اختر په مناسبت يې ٧٦ جنګي بنديان خوشي کړي او غواړي ګڼ نور هم ازاد کړي.
دغه مطلب په هغې خبرپاڼه کې راغلی چې د دې ډلې د بندیانو د تنظیم او خلاصون چارو کمېسیون له خوا خپره شوې ده.
سرچينه کاږي چې دغه جنګي بنديان د طالبانو د مشر د فرمان له مخې په اروزګان، کندوز، خوست او سرپل ولایتونو کې ازاد شوي او د جامو او کرايې په ورکولو سره یې خپلو کورنيو استولي دي.
سرچينه زياتوي، له اروزګان څخه ١٨، له کندوز څخه ٣٥، له خوست څخه ١٥ او له سرپل څخه ٨ کسان ازاد شوي او دا لړۍ لا هم روانه ده.
طالبان وايي، له څو نورو ولایتونو به هم ګڼ نور بندیان د اختر په مناسبت ازاد شي او خپلو کورنیو ته به واستول شي.
له دې مخکې (د زمري ١٧مه) هم د وسله والو طالبانو مشر ملا هبت الله د لوى اختر په مناسبت په خپل پيغام کې له خپلو کسانو غوښتي وو چې د اختر په ورځو کې د خلکو خونديتوب ته پاملرنه وکړي او هغوى ته يې سپارښتنه کړې وه چې د ولس هوساينې او خونديتوب ته پاملرنه وکړي او د هېوادوالو د خوښۍ او ارامۍ لپاره ټول لازم اقدامات وکړي.
Views: 1
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن