کابل (پژواک، ٢٣ وږى ٩٨): د امريکا له خوا د سولې خبرو له درېدو وروسته د طالبانو د قطر دفتر دوه پلاوي روسيې او چين ته تللي دي.
افغان خبريال سميع يوسفزى چې ډېرى مهال په قطر کې وي او د طالبانو سياسي فعاليتونه له نږدې څاري، د وږي په ٢٣مه په ټولنيزه شبکه ټويټر کې ليکلي چې د امريکا له خوا د خبرو تر لغوه کېدو وروسته د طالبانو دوه پلاوي روسيې او چين ته تللي دي.
هغه زياته کړې چې طالب پلاوي د ټرمپ له پرېکړې وروسته پر رامنځته شوو حالاتو د روسيې او چين له چارواکو سره سلا مشورې کوي.
که څه هم طالبانو تر اوسه په رسمي توګه د کومې خبرپاڼې له لارې مسکو ته د خپل پلاوي سفر نه دى تاييد کړى، خو ځينو رسنيو په قطر کې د طالبانو د سياسي دفتر د وياند سهيل شاهين له خولې دغه سفر تاييد کړى دى.
بلخوا د طالبانو يو درې کسيز پلاوى د روسيې له یوه ټلوېزيون (ار ټي) سره مرکه کړې، په دې مرکه کې ملا عباس ستانکزى، سهيل شاهين او يو بل تن ليدل کېږي.
راپورونه وايي چې دغه پلاوي د افغانستان لپاره د روسيې له ځانګړي استازي ضمير کابلوف سره ليدلي دي.
د طالبانو د قطر دفتر مرستيال او د مرکچي پلاوي مشر شېرمحمد عباس ستانکزي د روسيې له (ار ټي) ټلوېزيون سره په مرکه کې ويلي چې دوى اوس هم د سولې خبرو ته لېوال دي، خو که امريکا جنګ ته دوام ورکول غواړي، نو طالبان سل کاله نور هم جګړه کولای شي.
بلخوا د روسيې د بهرنيو چارو وزارت ويانده ماريا زخاروف په يوه خبري کنفرانس کې ويلي چې د امريکا د ولسمشر ډونالډ ټرمپ وروستۍ پرېکړه باید د افغانستان د سولې پروسې زيانمنه نه کړي.
هغې د طالبانو د دغه دريځ هرکلى کړی چې غواړي د سولې خبرو اترو ته دوام ورکړي او يو ځل بيا له امريکا سره درېدلې خبرې پيل کړي.
login or register a new account.
