سرچینې: د بغلان ګذرګاه نور ولسوالۍ طالبانو نیولې ده

پلخمري (پژواک، د تلې لومړۍ نېټه ۹۸): ځينې سرچيني وايي چې وسله والو طالبانو د بغلان د ګذرګاه نور ولسوالۍ نيولې ده، خو امنيتي مسوولين بيا دغه څرګندونې ردوي.

د بغلان ولايتي شورا رييس صفدر محسني د تلې په لومړۍ نېټه پژواک خبري اژانس ته وويل چې دوه ورځې وړاندې په ګذرګاه نور ولسوالۍ کې د حکومتي ځواکونو او طالبانو ترمنځ سخته جګړه شوې ده.

دى وايي چې له هغې ورځې وروسته دغه ولسوالۍ طالبانو نيولې ده خو اوس یې امنيتي ځواکونو د بېرته نيولو هڅې پيل کړې دي.

دغه راز يوې امنيتي سرچينې هم پژواک ته وويل چې له تېرو څو ورځو راهيسې د ګذرګاه نور ولسوالۍ ودانۍ د وسله والو طالبانو په لاس کې ده.

ده وويل چې د ګذرګاه نور په جګړه کې څلور پاڅون کوونکي وژل شوي او لس نور ټپيان شوي دي.

همدارنګه د يادې ولسوالۍ اوسېدونکي همايون خان پژواک ته وويل چې تر اوسه پورې درې ځلې دغه ولسوالۍ طالبانو نيولې ده.

دی زیاتوي چې د ولسوالۍ د سقوط پرمهال طالبانو ټول مهم توکي سوځولي او یو شمیر مهمات يې نورو سيمو ته انتقال کړي دي.

د نوموړي د معلوماتو له مخې، په دې جګړه کې تر اوسه شپږ امنيتي سرتېري وژل شوي، له لسو ډېر ټپيان شوي، يو شمېر طالبانو ژوندي نيولي او ترڅنګ يې سلګونه کورنۍ د تخار اشکمش ولسوالۍ او نورو سيمو ته کډه شوې دي.

خو د بغلان امنيتي مسوولين بيا دغه څرګندونې ردوي.

د دغه ولايت د امنيې قوماندانۍ وياند احمد جاوېد بشارت د ولسوالۍ سقوط مسئله ردوي خو وايي چې جګړه اوس هم روانه ده.

ده وويل: ((د ولسوالۍ مرکز اوس هم له موږ سره دى خو جګړه روانه ده.))

وسله والو طالبانو تر اوسه په دې اړه څه نه دي ويلي.

login or register a new account.