طالبانو د غزني د امنيې قوماندانۍ ملکي مرستيال وژل شوى

غزني ښار (پژواک، ٨ تله ٩٨): د غزني د امنيې قوماندانۍ ملکي مرستيال د وسله والو طالبانو له لوري په ميدان وردګو ولايت کې وژل شوى دى.

په دې اړه د غزني د امنيې قوماندانۍ وياند احمد خان سيرت د تلې په اتمه پژواک خبري اژانس ته وويل چې پرون ناوخته وسله والو طالبانو د ميدان وردګو ولايت د سيداباد ولسوالۍ په سالار سيمه کې د غزني د امنيې قوماندانۍ ملکي مرستيال ميرزا حسين وژلى دى.

هغه وايي: ((له کابل نه غزني ته روان و چې په دغه سيمه کې طالبانو له موټره ښکته کړى او بيا يې پر ډزو وژلى دى.))

ده وويل چې د پېښې په تور څوک نه دي نيول شوي، خو پوليسو يې په اړه پلټنې پيل کړې دي.

په ورته وخت کې د غزني د ولايتي شورا غړي حسن رضا يوسفي رسنيو ته ويلي چې تېره ورځ د غزني د امنيې قوماندانۍ ملکي مرستيال او د تخنيک امر د کابل-غزني پر لويه لار د طالبانو له لوري له موټره ښکته کړاى شوي دي.

ده وويل چې د تخنيک د آمر په اړه معلومات نشته، خو د امنيې قوماندانۍ د ملکى مرستيال جنازه په ملکي روغتون کې وه چې نن به يې کورنۍ ته وسپارل شي.

بل لورته وسله والو طالبانو تر اوسه په دې اړه څه نه دي ويلي.