د غزني پوهنتون کې چاودنې د ۱۲ نجونو په ګډون ۱۹ کسان ټپیان کړي

لومړى تعقيب- غزني ښار (پژواک، ١٦ تله ٩٨): د غزني پوهنتون په ادبياتو پوهنځي کې د چاودنې له امله د ١٢ نجونو په ګډون ١٩ کسان ټپيان شوي دي.

د غزني د والي وياند محمد عارف نوري د تلې په ١٦مه پژواک خبري اژانس ته وويل چې نن له غرمې مخکې شاوخوا لس بجې د غزني پوهنتون د ښوونې او روزنې پوهنځي کې چاودنه شوې ده.

هغه وايي چې په دې چاودنه کې د ١٢ نجونو په ګډون ١٩ کسان ټپيان شوي چې دا مهال په روغتون کې تر درملنې دي.

نوري زياتوي چې د يادې پېښې په اړه پلټنې پيل شوې او جزئيات به يې وروسته له رسنيو سره شريک کړل شي.

په ورته وخت کې د غزني ولايتي روغتون رييس ډاکتر بازمحمد همت پژواک ته وويل چې له يادې پېښې دوى ته ١٩ ټپيان انتقال شوي دي.

ده زياته کړه چې د ټپيانو روغتيايي وضعيت د ډاډ وړ دى.

دغه راز د غزني پوهنتون يوه محصل رحيم الله پژواک ته وويل چې چاودنه د دري ادبياتو پوهنځي په درېيم ټولګي کې شوې ده.

ده وويل چې د ټپيانو شمېر تر شلو هم ډېر دى.

د دې چاودنې مسووليت تر اوسه کومې وسله والې ډلې پر غاړه نه دى اخيستى.