کابل (پژواک ٦ لړم ٩٨): ولسمشر غني وايي، د سولې د ټينګښت لپاره د حکومت د ٧ ماده ييز پلان موخه په حکومت کې د ظرفيتونو لوړول او د طالبانو د ادغام د لارو چارو لټول دي.
له ارګ څخه پژواک خبري اژانس ته په رالېږل شوې خبرپاڼه کې راغلي چې ولسمشر محمد اشرف غني، دغه خبرې نن مازدیګر د امریکا متحدو ایالاتو د سولې انستیتوت له مسوولینو سره په کتنه کې کړې دي.
سرچينه زياتوي، په دغه کتنه کې چې په ارګ کې وشوه، دواړو لوریو په افغانستان کې د ولسواکۍ د بنسټيزه کولو او سولې په برخه کې د یاد بنسټ پر برنامو او فعالیتونو بحث او خبرې وکړې.
د امریکا متحدو ایالاتو د سولې انستیتوت مسوولینو وویل: "غواړو پوه شو چې جمهور رئیس او د افغانستان حکومت د سولې په اړه څه ډول لیدلوری لري او سولې ته د رسېدو په خاطر د کوم ډول عملي لارو په لټه کې دي."
سرچينه کاږي، جمهور رئیس غني په افغانستان کې د امریکا متحدو ایالاتو د سولې انستیتوت له برنامو د قدردانۍ ترڅنګ د باعزته او پایداره سولې لپاره د افغان حکومت د طرحې او برنامو په اړه خبرې وکړې.
د خبرپاڼې په حواله، نوموړي د باعزته او پایداره سولې د تامین په خاطر د افغان حکومت اووه ماده ییز پلان د تشریح ترڅنګ وویل، د یاد پلان موخه دا ده چې په حکومت کې ظرفیتونه پیاوړي او د طالبانو د ادغام لارې ولټول شي، دغه راز د لومړیتوبونو په ځانګړي ډول د هغو لارو چارو پر عملي کولو چې د ولسوالیو په کچه شخړې له منځه وړي، کار وشي.
ولسمشر د حکومتولۍ پر پیاوړتیا د ټینګار کولو ترڅنګ ویلي: "موږ به په افغانستان کې د جګړې د لاملونو پر ارزونې او پېژندنه لا زیات کار وکړو، دغه راز زموږ لپاره د جمهوریت مسئله او د ښاروندۍ موضوعات زیات مهم دي، ترڅو سوله په واقعیت بدله شي."
سرچينه زياتوي: "په دغه کتنه کې په افغانستان کې د شخړې د دوام پر لاملونو په ځانګړي ډول پر افغان ولس د طالبانو د تحمیلي جګړې په اړه هم بحث وشو."
د ولسمشر وياند صديق صديقي نن پژواک اژانس ته ويلي، د افغانستان حکومت له وسله والو طالبانو سره د سولې او پخلاينې په خاطر د سولې اووه ماده ييزه نوې طرحه جوړه کړې چې په کې سولې ته د رسېدو لپاره تر ټولو نږدې او عملي لاره شته.
په دې طرحه کې له امريکا غوښتل شوي چې له افغانستان څخه د خپلو ځواکونو تر ايستلو وروسته له ترهګرۍ سره د مبارزې تګلاره برابره کړي. دغه راز له طالبانو سره اوربند، له پاکستان سره د خبرو پړاوونه او په دغه هېواد کې د ترهګرو د پټنځايونو بندول د دې طرحې مادې دي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن